23 ოქტ. 2023
Bolt-ის პლატფორმა მუდმივად იცვლება და ახალი ფუნქციები ემატება, რათა მომხმარებლების გამოცდილება დღითიდღე გაუმჯობესდეს.
სანდრო პროექტების გუნდის ლიდერია და სხვადასხვა ფუნქციის, ინიციატივის იმპლემენტაციის პროცესებშია ჩართული.
თუმცა, Bolt-ში სამწლიანი მოღვაწეობის განმავლობაში, არაერთ პოზიციაზე მოსინჯა თავისი შესაძლებლობები. ამ ბლოგში ის საკუთარ ისტორიასა და ოცნებებს გვიზიარებს.
ბავშვობაში ჩვენს ოცნებებს ჩარჩოებს არ ვუწესებთ და ყველაზე ჯადოსნურ სამყაროებში ვმოგზაურობთ ხოლმე. სანდროსთვის ასეთ ოცნებას შოკოლადის ქარხანა ერქვა და მასაც, ვილი ვონკას მსგავსად, სურდა საკუთარი ქარხანა ჰქონოდა. სხვათა შორის, შოკოლადის სიყვარული დღემდე არ დაუკარგავს და ძილის წინ საფიქრალი საკითხების სიაშიც აქვს მისთვის საპატიო ადგილი მიჩენილი:
“მთელი ბავშვობა გავიძახდი, რომ შოკოლადის ქარხანა მინდოდა მქონოდა. ალბათ იმიტომ, რომ ძალიან მიყვარს შოკოლადი”.
თუმცა, გაზრდასთან ერთად, შოკოლადის ქარხნის ოცნების გვერდზე გადადება მოუწია, რადგანაც ცხოვრებას უფრო “დიდური” საზრუნავები და საფიქრალები მოაქვს ხოლმე.
მისი და Bolt-ის ისტორია საკმაოდ ექსტრემალურ პერიოდში იღებს სათავეს. პანდემიის დაწყებისას მეუღლესთან ერთად გერმანიაში იმყოფებოდა, დაბრუნების შემდეგ კი, კარანტინში მოუწია დროის გატარება.
სწორედ ამ პერიოდში გადაწყვიტა მოესინჯა ბედი და რეზიუმე Bolt-ში გაგზავნა. გასაუბრებაც კარანტინის დასრულების მეორე დღეს ჰქონდა.
Bolt-ში 3 წლიანი მოგზაურობა მომხმარებელთა მხარდაჭერის გუნდთან ერთად დაიწყო, შემდეგ ოპერაციების გუნდის მენეჯერის პოზიციაზე გადაინაცვლა, ამჟამად კი პროექტების გუნდს ხელმძღვანელობს.
სანდრო თვლის, რომ მისი ყოველი სამუშაო დღე განვითარების შესაძლებლობაა. ეს განწყობა ეხმარება მას მიიღოს მნიშვნელოვანი გამოცდილება და ცოდნა განსხვავებულ სფეროებში:
“სამი წლის განვლილ გზას რომ ვუყურებ, თავადაც მიკვირს რამდენი რამ ვისწავლე და როგორ გავიზარდე როგორც პროფესიულად, ისე პიროვნულად. 3 წლის შემდეგაც კი, ყოველდღიურად მიწევს ახალი რაღაცების კეთება და არც ერთი დღე არ ჰგავს წინას. ამ დროის განმავლობაში ბევრი როლი მოვირგე და უზარმაზარი გამოცდილება დავაგროვე სხვადასხვა მიმართულებით”.
ყოველდღიურად უამრავ სირთულეს ვაწყდებით და ყველას ჩვენეული ხრიკი გვაქვს ამ დაბრკოლებების გადასალახად. ზოგიერთი ადამიანი, ასეთ დროს ცდილობს წარმოიდგინოს, როგორ მოიქცეოდა ამ სიტუაციაში მისთვის მისაბაძი ადამიანი.
სანდროსთვის უდიდესი გავლენის მქონე პიროვნება მისი პაპა ბიჭიკო იყო, რომელიც სანდროს ბავშვობაში სიფიცხესთან გამკლავებასა და სიმშვიდის შენარჩუნებაში დაეხმარა. სწორედ მან გაააზრებინა, რომ თითოეულ ადამიანს საკუთარი პოზიცია აქვს და გადაწყვეტილების მიღებამდე აუცილებელია მათ მოვუსმინოთ, გავითვალისწინოთ მათი აზრი:
“ჩემი პაპა ბიჭიკო იყო ჩემთვის მისაბაძი ადამიანი. მისმა სიმშვიდემ ალბათ ყველაზე დიდი როლი ითამაშა ჩემი ხასიათის ჩამოყალიბებაში, ყოველთვის ვცდილობ სიმშვიდე შევინარჩუნო. ბავშვობაში ფიცხი ხასიათი მქონდა და ბიჭიკოს მიბაძვით დავმშვიდდი”.
ვილი ვონკას გარდა, სანდრო საკუთარ თავს სპაიკ ჯონზის ფილმის “ის” (Her) მთავარ პერსონაჟთან აიგივებს. ამის მერე ალბათ მარტივად მივხვდებით, რამდენად რომანტიკოსია. მისთვის განტვირთვის საუკეთესო გზაა ფილმის კინოთეატრში ყურება. ამ პროცესში ის მაქსიმალურადაა ფილმში ჩართული და ყურადღება არაფერზე ეფანტება.
ფილმებთან ერთად, სანდრო კომიქსების დიდი მოყვარულიცაა და თავისი პატარა კოლექციაც აქვს:
“თუ ხალხს სხვადასხვა ქვეყნებიდან სუვენიერები ჩამოაქვს მე ყოველთის კომიქსების მაღაზიას ვპულობ ხოლმე და ერთ ცალს მაინც ვყიდულობ”.
კომიქსებზე საუბრისას სანდროს ისიც ვკითხეთ, რომ შეეძლოს რა სუპერძალა ექნებოდა. ამ კითხვაზეც კი, მისგან საკმაოდ რომანტიკული პასუხი მივიღეთ:
“დანამდვილებით ვიცი, რომ ტელეპორტაციის უნარი მინდა მქონდეს. წარმომიდგენია, როგორი საინტერესო იქნება, როცა მსოფლიოს ნებისმიერ წერტილში 1 წამში აღმოჩნდები – შეგიძლია დილით პარიზში ჭამო კრუასანი და საღამოს ნეაპოლში პიცა მიირთვა”.
ბავშვობის ჯადოსნური ოცნებები სულაც არ ნიშნავს იმას, რომ ოცნებას გაზრდასთან ერთად ვწყვეტთ. არც სანდროს შეუწყვეტია ეს პროცესი და თავის მიზნებზე გაგვესაუბრა.
მისთვის ყველაზე მთავარი სურვილი საყვარელ ადამიანებთან ურთიერთობების შენარჩუნება და მოფრთხილებაა. ყოველთვის ცდილობს თუნდაც პატარ-პატარა მიღწევებით ისიამოვნოს და დააფასოს ყველა დეტალი, რაც ეძვირფასება.
რაც შეეხება კარიერულ მიზნებს, დიდი სურვილი აქვს, რომ ცოდნა და გამოცდილება, რაც ამ წლების მანძილზე შეაგროვა, სხვებსაც გაუზიაროს.
ფრაზა, რომელიც ყველაზე კარგად შეესაბამება თავის ცხოვრებისეულ ფილოსოფიას, არის ცნობილი ფილმიდან “ლა-ლა ლენდი”:
“Here’s to the ones who dream”
“მჯერა, რომ ყველა წამოწყება ოცნებიდან იწყება და შეგვიძლია ამ ოცნებას ჩვენი შრომით შევასხათ ფრთები. ვამაყობ, რომ მეოცნებე ვარ, რადგან ეს მაძლევს სტიმულს ოცნება რეალობად ვაქციო. ყველაზე მეტად მიყვარს ისეთი ოცნება რომ მისრულდება, რომელიც აღარც კი მახსოვდა.”
არავინ ვიცით, იქნებ სწორედ შოკოლადის ქარხანა გახსნას სანდრომ და ეს ბავშვობის მივიწყებული ოცნება მოულოდნელად აისრულოს.
შენ კი, თუ სანდროს ისტორიამ Bolt-ის გუნდის წევრობაზე დაგაფიქრა, გამოგვიგზავნე რეზიუმე აქ Bolt Careers, შემოუერთდი ჩვენს მისიას – ვაქციოთ ქალაქები ადამიანებისთვის.
.png)
