18 ნოე. 2024
თბილისი – მზისა და ვარდების ქალაქი – XII საუკუნიდან მოყოლებული საქართველოს დედაქალაქის სტატუსს ატარებს. ეს უძველესი ქალაქი გულში უამრავ საინტერესო და საოცარ ამბავს ინახავს. თბილისის ღირსშესანიშნაობები გამოირჩევა თავისი უნიკალურობით.
აქ შეგხვდებათ ძველი და მოდერნული არქიტექტურის სინთეზი, კოლორიტული შენობები და ძეგლები, დაუვიწყარი ხედები, რომლებიც გულგრილს არავის დატოვებს.
მოცემულ ბლოგში მოგიყვებით თბილისის იმ ადგილებზე, რომლებსაც აუცილებლად უნდა ესტუმრო, როცა ამ უძველესი ისტორიის მქონე ქალაქში აღმოჩნდები.
Bolt უკვე 10 წელია თბილისის ძველ თუ ახალ უბნებში დაატარებს ქალაქის გასაცნობად მოწადინებულ ადამიანებს, ამიტომ მოსაყოლიც ბევრი დაგვიგროვდა.
“ტიფლისი”, როგორც ასე 1936 წლამდე უწოდებდნენ, უამრავ ღირსშესანიშნაობას იტევს. თუმცა, სტატიაში ყველაზე დასამახსოვრებელ და აუცილებლად სანახავ ადგილებზე მოგიყვებით.
ალბათ ყველა თბილისელი დაგვეთანხმება, რომ ქალაქის გასაცნობად აუცილებლად ძველი თბილისი უნდა მოინახულო.
ის თავის ამბავს ყველაზე უკეთ მოგიყვება და პირველივე ნახვით განსაკუთრებულ ადგილს დაიმკვიდრებს ნებისმიერი მნახველის გულსა თუ გონებაში.
ბარათაშვილის ქუჩა კოლორიტული, სახასიათო არქიტექტურით გამოირჩევა, რადგან აქ განსაკუთრებით იგრძნობა თანამედროვე და ძველი შენობების ჰარმონიული კომპოზიციები.
ამ ქუჩაზევე აღმოაჩენ ძველ თბილისურ “კონკას”, რომელიც მე-20 საუკუნეში თბილისში მოძრავ ტრამვაის ერქვა, ახლა კი წინა საუკუნის ისტორიის მემატიანედ იქცა.
თუ ბარათაშვილის ქუჩას გაუყვები, იქვე შედარებით მცირე, შავთელის ქუჩაზე აღმოჩნდები და ულამაზესი არქიტექტურის მომსწრეც გახდები. რეზო გაბრიაძის “მარიონეტების თეატრი” გამოირჩევა უჩვეულოდ სახასიათო ფორმებით – საათის კოშკითა და პატარა კაფეთი.
აღსანიშნავია, რომ კოშკის გიგანტურ საათთან ერთად, აქვე შეგიძლია თბილისის ყველაზე პატარა საათიც აღმოაჩინო. ქუჩის დასახელებაში კი, ნომრად 13-ის მაგივრად მისი მათემატიკური კომბინაციაა წაწერილი, რაც ამ ადგილს იდუმალებას მატებს.
შეგიძლია შავთელის ქუჩაზე ჩაისეირნო, გაეცნო ხელნაკეთი ნივთების, ნახატების გამოფენას, საღამოობით ცოცხალი მუსიკაც მოისმინო და მიმდებარე მყუდრო კაფეებში ყავა ან ქართული ღვინო დააგემოვნო.
სწორედ აბანოთუბნის ტერიტორია მიიჩნევა თბილისის პირველ დასახლებად. თავად სახელიც “თბილი”, იგივე “ტფილი” ცხელი წყლების ანუ აბანოების თბილი წყაროების დასახელებას უკავშირდება.
აბანოში მიწიდან მომდინარე ცხელი წყალი უამრავი სამკურნალო თვისებით გამოირჩევა და მისი სტუმრობა ნამდვილად დაუვიწყარი გამოცდილებაა არა მარტო ტურისტებისთვის, არამედ ადგილობრივი მოსახლეობისთვისაც.
აბანოთუბნის ბოლოში ფერადი ფილებით მოპირკეთებულ “ორბელიანების აბანოს” დაინახავ, რომელსაც ჭრელ აბანოსაც ეძახიან.
მშვიდობის ხიდი მართალია ძველი არქიტექტურული ნიმუში არ გახლავთ, თუმცა მდინარე მტკვარზე გადებული ეს შუშის ნაგებობა 2010 წლიდან მოყოლებული უკვე თბილისის განუყოფელ ნაწილად იქცა.
ხიდით აღმოჩნდები რიყის პარკში, რომელსაც თუ ზემოდან გადმოხედავ, საქართველოს რუკის ფორმა აქვს. პარკი განსაკუთრებით აქტიურდება თბილისობის დღესასწაულზე, სადაც მრავალნაირი სასუსნავის დაგემოვნების, ტრადიციული კერძების გასინჯვისა და არაერთი სანახაობის ხილვის შესაძლებლობა გექნება.
პარკის ერთ-ერთი მთავარი ღირსშესანიშნაობა საბაგიროა, რომლითაც ძველ თბილისს გადაუფრენ და უძველესი ციხესიმაგრე ნარიყალას შესასვლელამდე მიხვალ.
რიყის პარკის მიმდებარედ მოდუდუნე მტკვარს მეტეხის ხიდი და ვახტანგ გორგასლის ძეგლი გადაჰყურებს.
რიყის პარკიდან საბაგიროთი შეგიძლია პირდაპირ ნარიყალას ციხესიმაგრის შესასვლელთან აღმოჩნდე. ციხესიმაგრე მთელ თბილისს გადმოჰყურებს და ქალაქის დაუვიწყარ ხედს გთავაზობს.
ნარიყალა ისტორიულად თბილისის დაცვის უმთავრეს ინსტრუმენტს წარმოადგენს და ქალაქის თითქმის ნებისმიერი წერტილიდან ჩანს, განსაკუთრებით შთამბეჭდავი კი ღამის განათებების დროსაა.
ციხესიმაგრის კედლები განსხვავებულ პერიოდებშია აგებული, თუმცა მათგან უძველესი მე-4 საუკუნით თარიღდება. თავად სიტყვა “ნარიყალა” სპარსული წარმოშობისაა და ციტადელს, შიდა ციხეს ნიშნავს. ის ისტორიულ ძეგლთა შორის ერთ-ერთ უძველეს ციხესიმაგრედ მიიჩნევა.
ნარიყალადან ფეხით თუ გაისეირნებ, თბილისის ყველაზე ცნობილ და სიმბოლურ ქანდაკებამდე, “ქართლის დედამდე” მიხვალ.
აღსანიშნავია, რომ ქანდაკება თავდაპირველად, როცა 1958 წელს აღმართეს ხის მასალით იყო აგებული, თუმცა მოგვიანებით 1963 წელს ალუმინით დაიფარა.
ქალის ქანდაკებას ცალ ხელში ღვინის თასი უჭირავს, მეორე ხელში კი ხმალი – ეს სიმბოლური რეპრეზენტაციაა, რომელიც ქართულ ისტორიულ ხასიათს უსვამს ხაზს: ღვინის თასი მოყვარეებისთვის, ხმალი კი მტრებისთვისაა გამზადებული.
თბილისის ბოტანიკური ბაღი მდინარე წავკისისწყლის ხეობაშია გაშენებული. “ქართლის დედის” ქანდაკების მონახულების შემდეგ ამ ბაღში მოხვედრა უმარტივესად შეგიძლია.
აქ იხილავ ულამაზეს ჩანჩქერებს, ვარდებისა და იასამნის კოლექციებს, მოსასვენებელ ფანჩატურებს, შადრევნებსა და იაპონურ ბაღსაც კი.
ბაღის ბილიკებზე სეირნობა ერთ-ერთი საუკეთესო გამოცდილებაა, მრავალფეროვანი ყვავილნარით, ხეივნებით, დუმფარებიანი აუზებით, ულამაზესი პატარა ხიდებითა და ეგზოტიკური მცენარეებით.
თუ აქტიური ცხოვრების სტილი გაქვს და დაკავებული ხარ მსგავსი აქტივობებით, ბოტანიკურ ბაღში შეგიძლია საცოც კლდესაც მიაკითხო.
თუ ულამაზესი ხედების ნახვა, ატრაქციონებზე გართობა, თბილისის მთავარი სიმბოლოს – ანძისა და ცნობილი პანთეონის მონახულება გსურს, გირჩევთ, რომ მთაწმინდაზე ფუნიკულიორით ახვიდე.
ფუნიკულიორი სამთო-საბაგირო რკინიგზაა, რომლითაც თბილისის ხედებს სხვა რაკურსითაც დაინახავ. ფუნიკულიორის შენობაში რესტორანი, კაფე და ლაუნჯ-ბარიცაა, ამიტომ აქ ნებისმიერი აქტივობის დაგეგმვას შეძლებ.
შეგიძლია საფეხმავლო ბილიკებს გაუყვე და წიწვოვან ტყეში ისეირნო, მთაწმინდის პანთეონს ესტუმრო და საქართველოს ცნობილი საზოგადო მოღვაწეების ისტორიებს გაეცნო, რომელთაც განსაკუთრებული წვლილი მიუძღვით საქვეყნო საქმეებში.
ქალაქის განსაკუთრებულობას მხოლოდ თბილისის ღირსშესანიშნაობები და ცნობილი ადგილები არ ინახავს. ქალაქი განუმეორებელი შენობებით, სახასიათო არქიტექტურით, გამორჩეული შენობებითა და მათი თანმდევი ისტორიებით თავს აუცილებლად დაგამახსოვრებს.
ბეთლემის ქუჩაზე მდებარე ვიტრაჟული სადარბაზო ქალაქის უცხო არქიტექტურის ერთ-ერთი თვალსაჩინო მაგალითია. მე-19 საუკუნეში აშენებული სახლის ფანჯრები ფერადი შუშებითაა მორთული და ხის მოჩუქურთმებული აივანიც ამშვენებს.
ეს ადგილი განსაკუთრებით პოპულარულია ფოტოგრაფებში, ამიტომ თუ ფოტოების გადაღება გიყვარს, მისი მონახულება შენს დღის გეგმაში აუცილებლად უნდა შეიყვანო.
თავისი დროის ყველაზე ცნობილი და პრესტიჟული სასტუმრო “ლონდონი” დღემდე ინარჩუნებს თავის ხიბლსა და იდუმალებას. სასტუმრო ერთ-ერთი პირველი შენობა იყო, სადაც ელექტროენერგია გაიყვანეს და ცნობილ სტუმრებს შორის კნუტ ჰამსუნი, პეტრე ჩაიკოვსკი, ტერენტი გრანელი და სხვები იყვნენ.
შენობის გამორჩეული ნაწილი სადარბაზო და კიბეებია, სადაც, სხვათა შორის, ყოველთვის ულამაზესი ფოტოები გამოდის, ამიტომ შეგიძლია ათონელის 31 ნომერს მიაკითხო და შენი გალერეა კიდევ უფრო გაამდიდრო.
თბილისის დახვეწილი არქიტექტურა გვაძლევს საშუალებას, რომ ეს სტატია კიდევ გავაგრძელოთ და უფრო მეტი გამორჩეულად ლამაზი ადგილი გაგაცნოთ.
ლადო გუდიაშვილის მოედანი ტურისტულად ერთ-ერთი ყველაზე მიმზიდველი ადგილია. უნიკალური თბილისური არქიტექტურა და მისი ისტორიული მნიშვნელობა ამ ადგილს ყურადღების ცენტრში აქცევს.
მოედნის რეაბილიტაციის პროცესები 2023 წელს დასრულდა და შუშაბანდებით, მყუდრო ეზოებითა და ხვეული კიბეებით დახუნძლულ შენობებს აერთიანებს.
მოედნის დასაწყისში მდებარე “ცისფერი სახლი” – ყოფილი ლიტერატურული რედაქცია – გამოირჩევა ხის ძველი აივნითა და უნიკალური ვიტრაჟებით. მოკლედ რომ ვთქვათ, გუდიაშვილის მოედანი და მასთან დაკავშირებული პატარა ქუჩები შენს გალერეას კიდევ უფრო მრავალფეროვანს გახდის.
თუ საინტერესო და ვინტაჟური ნივთების აღმოჩენა გიყვარს, მშრალი ხიდის ძველი ნივთების ბაზრობა და სამხატვრო გამოფენა არ უნდა გამოტოვო. აქ შეგხვდება ანტიკვარული ჭურჭელი, ფირის ფოტოაპარატები, სამკაულები, ფირსაკრავები, ორიგინალური სუვენირები და ათასგვარი განსხვავებული ნივთი.
მშრალ ხიდთან 9 მარტის ბაღი და დედა ენის პარკია, ამიტომ თუ ნივთების თვალიერებით დაიღლები, განტვირთვას და სეირნობასაც შეძლებ.
წინამძღვრიშვილის 39 ნომერში დამალული ეს საგანძური გულგრილს ნამდვილად არ დაგტოვებს. თურმე, როცა ქალაქური კოლორიტი დასჭირდებოდათ კინემატოგრაფებს, ყოველთვის ამ სახლს მოაკითხავდნენ ხოლმე.
სახლის მფლობელი ალექსანდრე ჯაგეტიანი ვაჭარი იყო, რომელმაც ორი ერთმანეთის მსგავსი სახლი აუშენა თავის ორ ვაჟს და ეზოთი გამიჯნა.
ხვეული კიბეებით, ვიტრაჟებითა და საოცარ შუშაბანდებზე ასული ვაზით, ჯაგეტიანების სახლი აუცილებლად შენი ერთ-ერთი რჩეული ადგილი გახდება.
ამ ადგილის შესახებ ჩვენ ცნობილმა ქართველმა მწერალმა არჩილ ქიქოძემ მოგვიყვა, რომლისთვისაც ჯაგეტიანების სახლი განსაკუთრებული მისამართია. არჩილ ქიქოძის მონათხრობის წაკითხვა და ძველ თბილისურ კოლორიტულ ამბებში მოგზაურობა კი ჩვენი ბლოგიდან შეგიძლია.
თუ თბილისის ღირსშესანიშნაობები მოინახულე და მის საოცარ ქუჩებში ხეტიალით დაიღალე, ქალაქში არაერთი პარკია, სადაც განტვირთვასა და ძალების აღდგენას შეძლებ.
ღირსშესანიშნაობებთან ერთად, წყნარი ადგილები აუცილებელია, რომ ქალაქში მაცხოვრებლებმა და ტურისტებმა განტვირთვა, სოციალიზაცია შეძლონ.
სად გავისეირნო თბილისში?
სიმწვანეში დასასვენებლად შეგიძლია ამ ადგილებს ესტუმრო:
სასეირნო წყნარი ადგილების შესახებ დამატებითი ინფორმაცია შეგიძლია ჩვენს ბლოგში წაიკითხო.
მაგრამ თუ იმდენად დაიღალე, რომ სეირნობის ენერგიაც აღარ დაგრჩა, შეგიძლია Bolt გამოიძახო და ნებისმიერ ადგილას კომფორტულად, სწრაფად მიხვიდე.
თბილისის ღირსშესანიშნაობები რომ ბოლომდე დაათვალიერო და ფეხით გადაადგილდე, ნამდვილად ძალიან ბევრ ენერგიას მოითხოვს. ამიტომ, ენერგიის გადასანაწილებლად, შეგიძლია დღის განმავლობაში ერთი ადგილიდან მეორეზე Bolt-ით მიხვიდე.
ან კიდევ, აპლიკაციაში რუკის დახმარებით Bolt-ის სკუტერი იპოვო და თბილისის ქუჩებში ჩაიქროლო.
იქნებ, შენ უფრო მეტი გამორჩეული ადგილი აღმოაჩინო, შემდეგ კი შენი შთაბეჭდილებები აუცილებლად გაგვიზიარე.
